مَنزلاں
گُڑہتی لئی کھجُور دی
ڈاچی ہوئے سوار
ہیٹھاں ریت، اسمانِیں تارے
ہَتھ ننگی تلوار
ڈاہڈیاں دے نال دُشمنی
روٹی کھاہدی کَنَک دی
کِیتی پار چَنہاں
جِتھے قبراں بوہتیاں
اوتھے وَڈّے گراں
ظُلم کمائے کَوہجیاں
رَبّ سوہنے دے ناں
وِسکی پِیتی رَج کے
گلّیاں بُھل گئے
دل دے بُوہے نُوں کھڑکایا
کُھنّے کُھل گئے
موتی ڈُھل کے اَکھ چوں
مِٹّی رُل گئے
اُلّی لا لئی جِیبھ نُوں
منہ وِچ رہ گئے دَند
سوچ نُوں جَندرا ماریا
اَکّھیاں کِیتیاں بند
اندر جھاڑُو پھیریا
باہر سَٹیا گند
ظالم ہَتھ بہبُود دے
قاتل کول فلاح
ڈُبدے کَنڈھیاں کولوں پُچّھے
محمد علی جناح
کِدھر گئیاں بیڑیاں
کِدھر گئے مَلّاح
منو بھائی
