اج فِر ایویں دل کملے نوں کھوہ جہی لگی ہوئی اے
لگدی سی جو یار کدی بس اوہ جہی لگی ہوئی اے
بابا جی! میں دُھپ وی پینا، فِر وی پالا لہندا نہیں
ہاڑ دے وچ کوئی میرے پِچھے پوہ جہی لگی ہوئی اے
ساڈے لہو توں پہلاں جِہنوں وَیر کرودھ ای لگدے سی
میں سُنیا اج اوسے رُکھ نوں موہ جہی لگی ہوئی اے
جِہڑے دِن توں ڈِھڈ دا کُتا سنگلی توڑ کے پِھردا اے
اوسے دِن توں پُچ پُچ تے توہ توہ جہی لگی ہوئی اے
نہ کِسے نوں لبھنا اے میں نہ کِسے نوں لبھنا واں
اللہ جانے اندر کاہدی ٹوہ جہی لگی ہوئی اے
سندھو تاں نہیں ڈِگدا کنڈ دے پِچھے ماں دے ہتھاں دی
اِنج لگدا اے حالے تیکر ڈھوہ جہی لگی ہوئی اے
ارشاد سندھو
