بے صبرا سی پیار دے وِچ
الفت دے اظہار دے وچ
تینوں چاہیا، تیرے ہوئے
کی فیدا تکرار دے وچ
جِتن دی مینوں طمع نہ کوئی
خوش سی اپنی ہار دے وچ
ہجر دا گل وچ پے گیا پھاہ
مِلیا کی اقرار دے وچ
پتھر دا میں بُت سدایا
ساہواں دے آزار دے وچ
کون کسے دے ونڈے دُکھ
اج کل ایس سنسار دے وچ
پیار دی قدر نہ دنیا کردی
چُنڑ دیندی دیوار دے وچ
دس فیر کسراں تینوں چاہندے
دنیا دے بازار دے وچ
سلیم نوں نپو خاک دے وچ
چاہت دے دربار دے وچ
محمد سلیم
