توتیا وے سانوں نہ ستا
چیتراں چ ڈنگے ہوئے
عمراں توں لنگھے ہوئے
ندیاں دے کنڈھیاں تے
کِکراں دے کنڈیاں تے
ٹنگے رہ گئے سدھراں تے چاء
توتیا وے سانوں نہ ستا
اگ لگے سینڑے وے
پھٹ وی کمینڑے وے
چڑھدی سویر تائیں
بھخدے نیں دیر تائیں
جِویں جِویں وگدی اے واء
توتیا وے سانوں نہ ستا
ہجراں نیں نُور ویلے
سدھراں تے بُور ویلے
ساہواں دے وے گیڑیاں چ
اکھیاں دے ویڑھیاں چ
وَین دینے ویکھ لئیں پوا
توتیا وے سانوں نہ ستا
چاننے جہی اکھ نُوں وے
سورجے جہی دکھ نوں وے
اک دل بھولڑے نوں
شاہ دے ممولڑے نوں
دیندے لوکیں ایویں ای رُلا
توتیا وے سانوں نہ ستا
آ کے ایویں چکراں چ
کئی کئی واری کَکراں چ
چھاواں کئی گھنیریاں وے
رُل گئیاں بیریاں وے
وطناں توں ہو کے جُدا
توتیا وے سانوں نہ ستا
باغ دے وے والیاں نوں
پُچھدا نہیں مالیاں نوں
سُکھ مُڈھوں پُٹ لیندا
ہاسیاں نوں لُٹ لیندا
لگدا ای جہدا ایتھے داء
توتیا وے سانوں نہ ستا
ارشاد سندھو
