لگدا اے اوہ ماں دی کُکھوں بن کے افسر آوندا اے
اپنے ہیٹھاں کیوں ویکھے اوہ جیہڑا اُپر آوندا اے
ایسے وصل وصال دے کولوں ہجر فراق ای چنگا اے
مُوڈ خراب ای لے کے ساڈے ولے دلبر آوندا اے
سجا کھبا ویکھن دی ہن اصلوں مہلت ملدی نہیں
سجے پاسوں اِٹ آوے تے کھبیوں پتھر آوندا اے
ڈردے ڈردے دسی مینوں ایہہ گل اک سپیرے نے
سپاں نالوں چوکھا ہن تے بندیاں توں ڈر آوندا اے
نہ اوہ مہر محبت کدھرے نہ جذبہ سن پینٹھ جیہا
آکھن نوں تے سال بسالے چھے ستمبر آوندا اے
کیوں نہ یاد کرے اوہ پل پل اپنے سر دے سائیں نوں
جیہڑی ماں دا کلا پتر رات گئے گھر آوندا اے
روز گھریں دفنا آوے پرواز اوہ اپنی غربت نوں
بن ٹھن کے جد شہری بابو اپنے دفتر اوندا اے
یعقوب پرواز
No comments:
Post a Comment
Note: only a member of this blog may post a comment.