اندرے اندر بدلاں دی گڑ گجّ وے اڑیا
کچیاں کندھاں، پُج وے اڑیا، بھج وے اڑیا
کل نوں خبرے کس ہتھ ہوسن دل دیاں واگاں
تیریاں لوڑاں، تیریاں تھوڑاں اج وے اڑیا
اساں وی چکّر کڈّھے پا پا چِٹّے بانے
اساں وی کیتی گھر تیرے دی حج وے اڑیا
کسے نہ فیر قبولیا سانوں مردیاں تائیاں
جیہی لگّی عشق ترے دی بجّ وے اڑیا
ساڈے پلّے سی ایہو اقبالی ہونا
تیرے نال وکیل وے اڑیا، جج وے اڑیا
تُوہیں ساری گل، ظفر ہاسے وچ پا لئی
اساں تاں رکھّی دو لفظاں دی لج وے اڑیا
ظفر اقبال
(چونیاں والے)
No comments:
Post a Comment
Note: only a member of this blog may post a comment.