میں تماشا ہاں میڈا پیار تماشا نہ بنڑا

 میں تماشا ہاں میڈا پیار تماشا نہ بنڑا

پیار کُوں پیار سمجھ یار تماشا نہ بنڑا

میں جیکر جرم کیتے بھوئیں تے اِتھائیں محشر کر

جھیڑا اُروار دا ہے، پار تماشا نہ بنڑا

شاعری کُن دا کرشمہ نئیں اے کُئی بئی شئے ہے

کر نئیں سگدا تاں اے بے کار تماشا نہ بنڑا

توں ہئیں لیلٰی توں اوندا عشق کِتھائیں سانبھ کے رکھ

او ہے مجنوں، توں اوندی کار، تماشہ نہ بنڑا 

جے ہے کربل تاں میں حاضر میڈا اصغر حاضر

جے ہے دربار تاں دربار تماشہ نہ بنڑا

اصغر گورمانی