پیسہ
چنگا ویلا آ وی جاوے
ماڑے دِناں دا چکڑ
مینوں آپنی تَلی تے دھریا نوٹ ہے لگدا
میں ایہہ نوٹ ہن خرچ نہیں سکدا
میرا ہتھ کمب جاندا
نشہ حقیقی
بُوٹی چرس نہ وهسکی
ہیری تے نہ پلم راکیا
نشہ تاں اپنی اُچی دھون دا
اپنے بوہتا ہون دا
کڑ کڑ کردیاں نوٹاں دا
نوٹاں اُتے چھپیاں مُورتاں
لمیاں تے نالے گول بُوتھیاں
ٹوپیاں اچکناں واسکٹاں تے ہیٹ
جنہاں دے کول نہیں پیسہ سوچن
پیسہ کِویں بنایا جاندا
پیسہ کِویں کمایا جاندا
بیٹھ کے کِداں کھایا جاندا
پیسہ تاں جادو دی پڑی اے
پیسہ پیسے نوں وی کھا جاندا اے
پیسے دا اے نور ظہور
کِنہاں ہتھاں دی مَیل اے
اک ہتھ توں دُوجے ہتھ تائیں آوندیاں
کی کچھ کردا
بندہ مر جاندا اے ایہہ نہیں مردا
انہاں دا ہو رہندا اے
جیہڑے کسے دے وی نہیں
جنہاں نے پہلی واری تکیا
اکھاں انہاں دیاں پھٹ گئیاں
اوہ ہُن اپنیاں شکلاں وی نہیں سیانڑدے
رات نوں رات نہیں سمجھدے
دن نوں دن نہیں جانڑدے
مظہر ترمذی
No comments:
Post a Comment
Note: only a member of this blog may post a comment.