کوہلو والے ڈھگے
اسِیں آں کوہلو والے ڈھگے
ساڈی اکھِیں کھوپے بدھے
سجے کھبے ویکھ نہیں سکدے
بدل وی اپنے لیکھ نہیں سکدے
سرہوں صبر دی پِیڑی جائیے
زرا وی متھے وٹ ناں پائیے
پیر دی مٹی چُمی جاندے
اکو دائرے گُھمی جاندے
پِنڈے روز پریناں کھائیے
تھکے آں پر، ٹُردے جائیے
کس نوں اپنا درد سنائیے
کس دے اگے ہاڑا پائیے
No comments:
Post a Comment
Note: only a member of this blog may post a comment.