ساہواں دی اے کھیڈ نہ پُچھ میں کِیویں جاری رکھی
تیرے باہجوں ایہناں تھوڑا جِند گُزاری رکھی
لوڑ پئی تے خشبو وانگ ہوا دے نال وی اُڈیاں
چانن کرن دی خاطر دِیوے نال وی یاری رکھی
خوشیاں نے وی دِتی ناں کج دَر تے دُوجی دستک
بُوہے نُوں کج میں وی کُنڈی اندروں ماری رکھی
وَرھیاں تِیکر جیویں کوئی گُھمن گھیری گُھمے
کہنے ساڈیاں راہواں دے وچ آن خواری رکھی
درداں والا سُورج سِر تے ہور ودھیرا تَپیا
زخماں اُتے اُنگل اُوہنے جِنی واری رکھی
راہوں چُک کے جہنے مینوں اپنے سینے لایا
میں ساہواں دی پُونجی اوہدے اگے ساری رکھی
دنیا نے وی اُتوں اُتوں اپنا آپ وکھایا
جوگی نے وی سَپاں والی بند پٹاری رکھی
عطا الحسن
No comments:
Post a Comment
Note: only a member of this blog may post a comment.