کیہ کہانی اے
کِسے نوں روگ ڈنگدے نیں
کسے نوں پیڑ کھاندی اے
کسے دا دل تڑفدا اے
کسے دی جان جاندی اے
کسے لئی کون رُلیا اے
کسے کیوں خاک چھانی اے
کِسے نوں کُجھ پتہ نہیں اے
کسے دی کیہ کہانی اے
کسے دے دن کھڑیجے نیں
کسے دی رات موئی اے
کسے دوپہر دے ہتھوں
کسے دی شام روئی اے
کسے نیں سوگ بھوگے نیں
کسے نیں موج مانی اے
کسے نوں کُجھ پتہ نہیں اے
کسے دی کیہ کہانی اے
کسے دے خاب ٹُٹنے نیں
کسے نے چُور ہونا اے
کسے نے کول رہ کے وی
کسے توں دور ہونا اے
کسے تے بیتنوں پہلاں
کسے تے بیت جانی اے
کسے نوں کُجھ پتہ نہیں اے
کسے دی کیہ کہانی اے
کِسے دا نیڑ کِنا اے
کِنا کو ساتھ پکا اے
کسے دا کون دردی اے
کسے دا کون سَکا اے
کسے دا کون بیلی اے
کسے دا کون ہانی اے
کسے نوں کُجھ پتہ نہیں اے
کسے دی کیہ کہانی اے
کسے لئی رحم ہوندے نیں
کسے تے قہر ہوندا اے
کسے لئی جام ہوندے نیں
کسے لئی زہر ہوندا اے
کسے لئی خون حاضر اے
کسے توں دور پانی اے
کسے نوں کُجھ پتہ نہیں اے
کسے دی کیہ کہانی اے
کسے دی سُر تے پھوڑے نیں
کسے دی تال زخمی اے
کسے دے پیر ٹُٹویں نیں
کسے دی چال زخمی اے
کسے دا ذہن کورا اے
کسے دی سوچ کانی اے
کسے نوں کُجھ پتہ نہیں اے
کسے دی کیہ کہانی اے
ارشاد سندھو
No comments:
Post a Comment
Note: only a member of this blog may post a comment.