جوں پانی وچ پتاسے دی

 جُوں پانی وِچ پتاسے دی

کیہہ عمر حیاتی ہاسے دی

کوئی کُوڑا سچّا چارا کر

کوئی صورت کڈھ دلاسے دی

واہ وا ہے وصل دی کِن مِن پر

کیا بات ہے، ہجر چماسے دی

رب رکھے تے سر بچدا ہے

گل کچی ڈانگ منڈاسے دی

کوئی شان ہے اوہدے کجّل دی

کوئی ٹوہر اوہدے دنداسے دی

کیا ول اوہناں پھُلجھڑیاں دے

کیا صورت گھُنڈ اکواسے دی

کیہ لِکھاں اوہدے نخرے دا

کیہ بات کراں اوہدے ہاسے دی

اوہ بدلی وچ جا وسیا ہے

اوہ سُنے گا کنج پیاسے دی

پھیرا کوئی ایدھر اِک ادھا

کوئی من تے سہی نراسے دی

گل لا کے بھُنجے سٹ دینا

ایہہ رِیت ہے تیرے پاسے دی

اوہنوں ہاک نہ مار رندھاویا

گل کھُل جؤ گی بھرواسے دی

افضل احسن