سوہنا بچپن ویکھیں یارا بھلیں نہ

 سوہنا بچپن ویکھیں یارا بُھلیں نہ

تُوں سیں ماں دا راج دُلارا بھلیں نہ

اپنے نال دے سارے سجن بیلی تے

شیکو، منھا، طیفا، جھارا بھلیں نہ

ویلا موجاں مارن والا یاد رکھیں

ٹوبے، نہراں، چھپڑ، گارا بھلیں نہ

لُکن میٹی، چُھون چھپائی کھیڈیں تے

پنڈ دا آل دوالا سارا بھلیں نہ

نہ کوئی فکر نہ فاقہ کوئی ہُندا سی

کرماں والا سماں پیارا بھلیں نہ

کچے کوٹھے نگھے ٹھنڈے ہُندے سن

کُھلی ڈیوڑھی، بیٹھک ڈھارا بھلیں نہ

جتھے آپاں رل مل کیتیاں سن

یاداں بھریا اوہ چوبارہ بھلیں نہ

سوہرے کُڑیئے بھانویں سُکھی وسیں تُوں

امبڑی دا اوہ گھار دوارہ بھلیں نہ

مکی والی روٹی اُتے مکھن تے

ساگ سرہوں دا مزا کرارا بھلیں نہ

ویاہواں اُتے لِیڑے ون سونّے تے

چُنی، گوٹا، گول گرارہ بھلیں نہ

بھانویں کوٹھیاں کاراں دا توں مالک ایں

کیتا غربت وچ گزارا بھلیں نہ

گُڈی تیری جے آسمانیں چڑھ جئے تے

رب سوہنے دا حکم پیارا بھلیں نہ

کنکاں دی جد واڈھی سارے کردے ساں

کم اوہ سارا اوکھا بھارا بھلیں نہ

ماہیے اپنے چن ورگے نال گلاں تے

سرگی دا اوہ کلا تارا بھلیں نہ

جنہے کیتا آپے بھر لُو قاسما اوئے

چھیتی کر دُو رب نتارا بھلیں نہ

قاسم سرویا