گیت میرے پنجاب دا
بوٹا بوٹا تیرا گل پھل پتیاں دے نال سجے
کلیاں گلاباں دی پنجیب چھنکا کے
دِسے چھم چھم خوشیاں دا مور نچدا
انگ انگ تیرا ہرا پیلا، لال لال بُلھ
تھیبے نال بدھی جھولی دی جے گنڈھ جاوے کُھل
جاوے ٹبیاں تے ٹویاں وِچ رنگ رچدا
لما سرو جیہا قد، کھِڑے گنب جیہا مُکھ
لک لاوے دی چھمک، لال بُلیہاں تے سک
تک الہڑ جوانیاں دا دل تمکے
تیرے مکھڑے دی دکھ جویں چن دی چمک
لال لاچے دی دھریک جویں نیلے اسمان اُتے
تاریاں دی لیک چم چم چمکے
نی لوی لغرے گلاب دیئے، ہیریئے پنجاب دیئے
سسی میرے خواب دیئے، سوہنیئے چناب دیئے
نی تیرا روپ تے سروپ جادو حق سچ دا
نِت سجری سویر بھر پُھلاں دی چنگیر
وارے ہالیاں دے سِراں اُتوں
توڑ کے بہاراں دے گلابی گجرے
نی پنجاب نی پنجابنے رُوپ تیرا اِک مُک
سانوں تیری سِک جویں
مِتراں دی سک دے سواد سجرے
مُٹھ مُٹھ ٹپہ ٹپہ، گِٹھ گِٹھ ، چپہ چپہ
جند جان توں سچا، میری پگ توں وی اُچا
مینوں دھرتی دا مان تے سُہان جچدا
لین پیلیان ہُلارے، ٹھنڈی ٹاہلیاں دی چھاں
یاراں بیلیاندے سنگ، گوڑھے مہندیاں دے رنگ
تیری مٹی وچ رب نے سندھور گھولیا
تک روپ لشکارے اکھیں جان چھبیاں
لوکی لبھدے سمندراں چ مار ٹبیاں
اساں ڈلاں دیاں اوڑاں وِچوں سونا رولیا
ایتھے الہڑ جوانیاں دے کھڑدے گلاب
لجّاں غیرتاں دے مان تے سُہان لاجواب
سینے پیار والی اگ دا تندّور مَچدا
سوہنے وطناں نظارے سارے نہراں تے کنارے
ویہندے پانیاں دے دھارے کوٹھے جُھگیاں چبارے
ساڈی اکھیاں دے تارے تیرے ککھ لکھ دے
راکھے حداں دے جوان وار دھرتی توں جان
پیندے گُٹ گُٹ لہوواں تے شہادتاں دے جام
گھر قوم دے آباد زندہ باد رکھدے
تیرے خادماں دی خیر شالا رہوے پیرو پیر
تیرے شیر تے دلیر جاندے جاناں اُتے کھیڈ
سانوں ہیریاں توں مہنگا تیرا نگ کچ دا
خادم فرید چشتی
No comments:
Post a Comment
Note: only a member of this blog may post a comment.