ہاڑیاں دے وچ درد پروئے، کیہہ لبھا
انھیاں اگے بہہ کے روئے، کیہہ لبھا
ایویں اپنے پھٹ وکھائے لوکاں نوں
ہور شریکاں تِیر چبھوئے، کیہہ لبھا
راتاں دا جو نھیر ونڈاون آئے سی
چھڈ کے ٹُر گئے لوئے لوئے، کیہہ لبھا
اپنے ڈِھڈھ تے پتھر بنھ کے لوکاں نے
فرعوناں دے پتھر ڈھوئے، کیہہ لبھا
کلے کلے لِتر پولا کھاندے رہے
حق تے وی ناں کٹھے ہوئے، کیہہ لبھا
مندی بھوگی جگ تے آن غریباں نے
ناں ایہہ جیوندے ناں ای موئے، کیہہ لبھا
نثار احمد
No comments:
Post a Comment
Note: only a member of this blog may post a comment.