ا اللہ خالق رازق مالک قدرت سندا والی
آدمؑ جن ملائک ہر شے در تے نت سوالی
اوہ رحمت دا دریا الٰہی بے پرواہ کہاوے
ظاہر باطن قدرت اس دی کجھ حساب نہ آوے
میں کجھ خبراں علموں پایاں قدرت نال سنائیں
جا نجا الف اکلا آہا ناں سی شام صباحیں
نہ آسمان نہ زمیاں دوزخ نہ سن ایڈ سرشتے
نا شب روز نہ آتش پانی نہ سن حور فرشتے
جدوں کیتا رب نور نبیﷺ دا ظاہر فضل کمالوں
اسم محمدﷺ کہیا ا لہٰی میموں حیوں دالوں
پھیر نبیﷺ دے نوروں کیتا کل ظہور الہٰی
جو کچھ نورنامے وچ لکھیا جانو سچ گواہی
ایڈا فضل نبیﷺ تے کیتا آپ اللہ حق تعالیٰ
وچہ قرآن لکھی خوشخبری ذکر معراجے والا
پاک محمدﷺ بندے اتے فضل خداوند چاہیا
مسجد اقصٰے مکے تائیں راتیں سیر کرایا
تھوڑی رات حساب پلاں دی بہتی رات نہ آہی
مسجد اقصٰی جا پہنچا یا قدرت نال الہٰی
قادر یار
No comments:
Post a Comment
Note: only a member of this blog may post a comment.