کوئی پل نکھڑ کے دل توں بھلایا نہ تیں نہ میں
مل پیوں تاں سکھڑاں موہوں الایا نہ تیں نہ میں
مر گئی ملن دی آس کفن پا کے ہجر دا
گھر توں مگر جنازہ چوایا نہ تیں نہ میں
پُچھدی ہے رُت اُداس جو کتھ ہن نویں لباس
چولیں تے ول کوئی سیپ کڈھایا نہ تیں نہ میں
شیشہ بدن اساں اساں پتھر مزاج لوک
مر کیں وی اپنا سوگ منایا نہ تیں نہ میں
نفرت تاں ہئی ڈوہیں کوں مگر جان کیا وجہ
کیتا قبول پیار پرایا نہ تیں نہ میں
شاہد دی اکھ دے تھل تے تیڈی ہنجھ دا راج ہا
ساون اکھیں توں ول کوئی وسایا نہ تیں نہ میں
عزیز شاہد
No comments:
Post a Comment
Note: only a member of this blog may post a comment.