انج ای رُکھ دی چھاں ٹُردی اے
جسراں سر توں ماں ٹردی اے
سوچ نوں خورے پیڑ اے کوئی
نہ بہندی اے نہ ٹردی اے
اندر کُھوہ وی خالی سمجھو
ساہ اے جسراں لاں ٹردی اے
جدھر سوہنی اودھر اکھاں
لے کے نال چنھاں ٹردی اے
اوہدی فوٹو تکنی پیندی
غزل اگانہہ ای تاں ٹردی اے
قسمت کیوں نئیں ہلدی جُلدی
حالانکہ ہر تھاں ٹردی اے
تجمل کلیم
No comments:
Post a Comment
Note: only a member of this blog may post a comment.