اوہ ویلا چنگا سی
جدوں ویہلے رہندے ساں
اوکھا سووکھا کہندے ساں
نہ کوئی پروا سی کماں دی
نہ ابے دی نہ اماں دی
مرضی اپنی کردے ساں
جس تے مرضی مردے ساں
کدی جاندے ساں پلیاں تے
بیٹھناں ہوٹلاں کھلیاں تے
تاش دی بازی کدے پئے لائیے
کالجوں کدی چھٹی منائے
کوئی نہ پُچھدا دسدا سی
دل وی رہندا ہسدا سی
سجناں نال ای وسدے ساں
دل دی گل وی دسدے ساں
لبھدے پئے ہاں ہن اوہ ویلا
گزر گیا جو البیلا
سارے خورے کتھے گئے
رنگ جیون دے پھِکے پئے
پے گئی اپنی اپنی سب نوں
سجن کی بھلے ہاں رب نوں
کتھے گیا اوہ شٹلی
جیندی کدے نہ سی چلی
کِھلر گئی تاش دی گڈی
رہ گئی پینگ اُڈی دی اُڈی
راتاں رَت پیاں روندیاں نیں
گلاں ہُن ناں ہوندیاں نیں
پئے گیا ہر کوئی رولیاں وچ
کِھلریا وا ورولیاں وچ
اکرم ثاقب
No comments:
Post a Comment
Note: only a member of this blog may post a comment.