خود دار منگتی
ہتھ چھوڑ کے گل کر غیرت مند
میں دلگیر فاحشہ نہیں
چلو قید حالات دی جیل اچ ہاں
پر الہڑ شوخ رقاصہ نہیں
پوکھا ویکھ کے روندے بالاں نوں
پہلے بُک بُک اتھرو روندی آں
بندے ویکھ کے مینوں ہس پوندین
جداں ہر ہر موڑ تے کھلوندی آ
مینوں ہرگز شوق گدا دا نہیں
مینوں قاصہ وقت نپایا اے
ہر کوچہ پھرنا عادت نہیں
مینوں در در بخت پھرایا اے
میں جسم فروش کمینی نہیں
بس رب دے نام تے منگدی آں
نہ کہیں دی سیج تے وکدی آں
نہ گھنگرو بن کے نچدی آں
توں شہر دا حاکم کجھ نہ دے
پر ایڈا غلط خیال نہ کر
میرے شرم حیا دی چادر نوں
انج پیراں ہیٹھ پامال نہ کر
رکھ سامب کے قاسم دولت نوں
دو ٹکیاں نال اوقات نہ منگ
میں سائل ہاں کوئی کنجری نہیں
خیرات دے بدلے رات نہ منگ
نامعلوم
No comments:
Post a Comment
Note: only a member of this blog may post a comment.