پنجابی پوٹھواری پوٹھوہاری پہاڑی شاعری
سوچاں نی پُکھ
اچھو تکی اے پرانڑیں جئے سوالاں در
تہوڑاں دُبیاں ہویاں کِج مثالاں در
فِر نواں جیا سوچی اے رَلی تے
جیباں مغز توّے پر تلی تے
پھُوک سوچاں نی پھری ہوئی روٹی
گل لاونڑیں اِچ گلی ہوئی بوٹی
فنکاری نال منہ اے اِچ بائی تے
دھیان ہاڑاں بُن چِتھی ہضمائی تے
گھُٹ پانڑیں عقلی پی خُمارے نال
چھُوٹ سٹیے باہر ڈکارے نال
سچ خون نچوڑئیے خوراکاں ناں
رت رووھ پئی بدائے مذاقاں ناں
فِر ہوش وی سارے اُڈائی تے
اَکھ غیب نی اَکھ وِچ بائی تے
کوئی قدیم جئے سوال اساں کرئیے
کوئی جدید جئے جواب متے سنئے
ذرا پُچھئے کہ میں تو ہِک آں
کُن تُوں آکھیا یا میں سا
کھیڈ توں ایں یا کھڈاری میں آں
تو علاج تے بیماری میں آں
میں پانڑیں تے شرابے وِچ توں ایں
میں نیندریا تے خوابے وِچ توں ایں
بول چُپ ایں جوابنڑاں کیوں نئیں
توں اپنڑاں حسابنڑاں کیوں نئیں
توں درد تے میں کوئی چِیک آں
توں کتاب تے میں جنج لیک آں
توں اَکھ یا میں کوئی لو آں
جے توں او نئیں تے فِر میں او آں
دس دوئی نا اے ایکا کے شے ای
اے بدی نال نیکا کے شے ای
ہِکی دُوئے نی کیوں اَساں چھِک آں
جے اساں دوئے ازلاں توں ہِک آں
فِر چھولی ابلیس اِچ کُنڑ آ
کائناتی نیلے چولے اِچ کُنڑ آ
اے سوال وی ماضیاں نے عیب اے
جواب اِچراں وی غیب نے غیب اے
اچھو چھوڑئیے گل اے پُرانڑیں
ویلے چھال ماری اگلی کہانڑیں
ہنڑ دسو کے سوچئے رَلی تے
جیباں مغز توّے پر تلی تے
شعیب خالق
No comments:
Post a Comment
Note: only a member of this blog may post a comment.