پنجابی شاعری
جِیندے جی نہیں مَندے لوکی منکر نیں کرداراں دے
موئیاں بعد مجسمے لگدے ساڈے جئے فنکاراں دے
سوچ سمجھ کے کرِیں اشارہ چار چفیرے اکھاں نیں
پہلے کلّے کَن ہوندے سی، شہر دِیاں دیوراں دے
پیر فقیر نُوں کڈھ کے تیرا سارا شہر منافق اے
تُمّے ورگی فطرت والے مِٹھے نیں گفتاراں دے
کوئی ڈردا گل نہیں کردا سب نوں جان پیاری اے
راتیں جہڑے چور پھڑیجے بندے نیں سرداراں دے
مُلّاں، پنڈت، فادر سارے اندر وڑ کے بہ گئے نیں
ٹھیکے جو منسوخ نیں اج کل مذہبی ٹھیکیداراں دے
اکرم ریحان
No comments:
Post a Comment
Note: only a member of this blog may post a comment.