ویلے دا سپ
ویلے دا سَپ لِیکاں واہندا
اگاں نوں ٹُردا جاندا اے
نیڑیوں ہو کے لنگدا اے پر پتہ ای نہیں چلدا
کِدھروں آیا کِدھر گیا کس پاسے مُڑیا
پتہ ای نہیں چلدا
امڑی نے سمجھایا سی
گَل سُن میریے دِھیے رانیے
ساری حیاتی توں بس سِدھی لِیک تے ٹُردیاں جانا اے
ورنہ ظلم کمانا اے
ابے آکھیا آہو دِھیے کِھچ دِتی میں لچھمن ریکھا تیرے چار چفیر
جگ وِچ بڑا ہنیر
کرنی نہیں تو پار کسے دا نہیں اعتبار
اک دن بھائیا کہن لگا
کُونجاں ہونیا بیبی کُڑیاں
سِدھی لکیر تے ٹُردیاں جاون
نہ دل پراون
تے سِدا سُکھ پاون
سن لے میریے پیاریے بہنے
کدے نہ کھمب کھلاریں توں
دل آگے نہ ہاریں توں
شرم حیا بس ہووے تیرا حُسن جمال
لِیکاں دا تے لیکھاں دا توں کریں خیال
سُن کے اے سب اپنے آپ تے نظر جو پائی
سُندر جوبن تک شرمائی
مُکھڑا میرا سوہنا سی
پِنڈا وی من موہنا سی
لِیکاں اُتے کھڑی میں کلی کیڑی کاڑا کھیڈدی ساں
کِنی دُور نکل آئی تے پتہ ای نہیں چلیا
گوڈے چک چک خانے ٹپے
گِیٹے روڑے، ہیرے لبھے
لِیکاں مینوں کِیتا قید جھاٹا سارا ہویا سفید
جیون دا نہ پایا بھید
شیشے وِچ مُکھ ویکھ کےاکھ میری ہسی روئی
کی ساں میں جیوندی یا موئی
ویلے دا سپ چُپ چپیتے وڑ آیا
جپھی پا کے لیٹ گیا
اپنے آپ نوں میرے گرد ولیٹ لیا
انت میرا آیا نزدیک
ڈنگدی مینوں رہی ایک
سپنے رج رج مُکھ تے میرے لِیکاں واہیاں
ہائے تباہیاں
گُنجلدار اک جال بنایا جیون نوں جنجال بنایا
سالم مینوں نِگل گیا
خورے کِدھر نکل گیا
پتہ ای نہیں چلیا
نیلم احمد بشیر
No comments:
Post a Comment
Note: only a member of this blog may post a comment.