کلاسیکی سرائیکی شاعری
اساں سو بدمست قلندر ہئوں
کڈیں مسجد ہوں کڈیں مندر ہئوں
کڈیں چور بنوں کڈیں چار بنوں
کڈیں توبہ استغفار بنوں
کڈیں زہد عبادت کار بنوں
کڈیں فسق فجوریں اندر ہئوں
کتھاں درد کتھاں درمان بنوں
کتھاں مصر کتھاں کنعان بنوں
کتھاں کیچ، بھنبھور دا شان بنوں
کتھاں واسی شہر جلندر ہئوں
کتھاں صومعہ، دیر، کنشت کتھاں
کتھاں دوزخ، باغ بہشت کتھاں
کتھاں عاصی، نیک سرشت کتھاں
کتھاں گمراہ ہئوں کتھاں رہبر ہئوں
ہیوں اوقلاش تیں رند اساں
پئی نوری ہند تیں سندھ اساں
ہیوں بے شک عارف چند اساں
کل راز رموز دے دفتر ہئوں
ہن ناز، نواز دے ٹول کڈیں
ہے مونجھ منجھاری کول کڈیں
رلے ڈھول کڈیں، گیا رول کڈیں
کڈیں بر در ہئوں کڈیں در بر ہئوں
ول واتوں سمجھ فرید، الا
کر محض نہ شعر جدید ولا
ہے چالوں حال پدید بھلا
تونے کیجو سارے ابتر ہئوں
خواجہ غلام فرید کوریجہ
No comments:
Post a Comment
Note: only a member of this blog may post a comment.