جدید پنجابی شاعری
غوث قطب ابدال تے لبھو
بدلے جیہڑا حال تے لبھو
خورے کتھے ٹُر جاندے نے
دن مہینے سال تے لبھو
ہر بندے دی اِکو کوشش
دِین نوں چھڈو، مال تے لبھو
کیہڑی گل توں آ جاندا اے
سوچاں وچ پوچال تے لبھو
یار گواچے مِل جاندے نے
رل کے میرے نال تے لبھو
قیدی کیتا جس نے سب نوں
زُلفاں دا او جال تے لبھو
باطن جہنوں غم نہ کوئی
بندہ او خوشحال تے لبھو
باطن رجانوی
No comments:
Post a Comment
Note: only a member of this blog may post a comment.