پنجابی عارفانہ کلام
اوہ جھولی کسے نا کم دی اے، جے خیر پیا وچ کوئی نئیں
اُس اکھ دے پلّے ککھ وی نئیں، جہڑی یار دے غم وچ روئی نئیں
لکھ بھاویں ہار سنگھار کرے، پئی نخرے ناز ہزار کرے
جہنوں پِیتم اپنا نا سمجھے، اوہ اجے سہاگن ہوئی نئیں
دَر دَر دے ٹھیڈے کھاویں گا، جے پٹّا نا گل وچ پاویں گا
فیر سارا زمانہ آکھے گا، ایہدا والی وارث کوئی نئیں
ایہ کم اے سُچیاں، سچیاں دا اُلفت نئیں دعویٰ کچیاں دا
بھانڈے نوں تریڑاں پے جاون، جے مِٹّی دَب کے گوئی نئیں
ایویں تے دِیوے بَلدے نئیں، ایویں پروانے جلدے نئیں
جو عشق نبیؐ وچ مر جاوے، اوہ جیوندی اے اوہ موئی نئیں
نسبت پہچان ظہوری اے، پر نِیت بوہت ضروری اے
جو اپنے پیا دی ہوئی نئیں، اوہنوں مِلدی کِتے وی ڈھوئی نئیں
محمد علی ظہوری
No comments:
Post a Comment
Note: only a member of this blog may post a comment.