جدید پنجابی شاعری
جے تُوں وِکیا عشق بازار وی نئیں
جے تُوں چڑھیا اُتے دار وی نئیں
ایڈھا سستا سودا پیار وی نئیں
ایڈھا سوکھا لبھدا یار وی نئیں
کئی جنگل گاہنے پیندے نے
کئی دوزخ لنگنے پیندے نے
جیہڑا بنڑ کے عاشق سُکھ ڈھونڈے
اوہدی قسمت وِچ دیدار وی نئیں
دل دِتیاں باجھ نہ پیار ملے
سِر دتیاں باجھ نہ یار مِلے
جے او ایس مُلوں وی مِل جاوے
ایتھوں سستا ہور وِپار وی نئیں
ایہ ایسی کھیڈ پیاراں دی
ایہ ایسا بحر محبت دا
کِسے کیتا ایویں پار وی نئیں
کوئی مَنیا اپنی ہار وی نئیں
کُجھ سمجھ نہ آوے لوکاں نُوں
او کاہدے نال شہید کرے
ڈِٹھی یار دے ہتھ تلوار وی نئیں
پر خالی جاندا وار وی نئیں
جیہڑا ہو کے کھڑا کناریاں تے
چھلّاں دے نظارے لیندا اے
جِندڑی دے ایس سمندر دے
او موتیاں دا حقدار وی نئیں
جد ماہی پُچھیا حال میرا
وگ پئے پرنالے ہنجوواں دے
میں رہ سکیا خاموش وی نئیں
پر کر سکیا اظہار وی نئیں
سجنڑاں ایس چُوٹھی دُنیا نے
کی دے دِتا اے کی دے دینا اے
چل یار نوں راضی کر لیئے
ایس ساہ دا کوئی اعتبار وی نئیں
مُدتاں توں چرچا سُنڑدے ساں
اج اکھیں ڈِٹھا اے اعظم نوں
سالک وی نئیں مجذوب وی نئیں
کوئی مست وی نئیں ہُشیار وی نئیں
اعظم چشتی
No comments:
Post a Comment
Note: only a member of this blog may post a comment.