جدید پنجابی شاعری
دِیدے گئے چُندھیا میں کی دساں کون کرن میرے اتے وار آیا
حملہ ور سی برق وش نال ای اوہ لا کے لشکنے کجھ ہتھیار آیا
میرا ساحل اے عین گرداب اندر میریاں ٹھوکراں دے وچ منزلاں نیں
ضبط وچ ساں تے بے قرار ساں میں جدوں پھڑکیا تدوں قرار آیا
برکت میرے جنون دی نال اک دن سارے دشت نے بن گلزار جانائیں
اوہدے وچ پئی پھُلاں دی دَکھ پیندی میرے پیر ہیٹھاں جیہڑا خار آیا
ہووے اوہ غمزدہ نہ میں اوہنوں دوروں ویکھ کے اتھراں کھِچ لیاں
کسے غم دی گھڑی وچ کول میرے جدوں کوئی میرا غمگسار آیا
ویکھو کس ترکیب دے نال چوبھاں میرے روح غمناک نوں دین لگائے
میرے لئی جس جیوندیاں خار بیجے پان قبر تے پھلاں دے ہار آیا
میرا ویکھنا کدی منظور نئیں سی ہن اوہ ناں وی میرا نئیں لین دیندے
اوہنا کول جا کے چارہ ساز میرا خبرے کی کرتوت کھلار آیا
ڈاکے عقل شعور تے کسے تھاویں چھاپے دین ایمان تے وجدے نیں
اوہدے شہر ول جاندیاں موڑ جیہڑا آیا راہ وچ سخت دشوار آیا
مینوں اوہ زِمیوں ہیٹھاں لاہن لگائے جنہوں دُھر اسمان تے چاہڑیا میں
کڑتا گل وچ میرا تے نال میرے باہواں کُنج کے کرن تکرار آیا
اکو فضل میں صافی دا گھُٹ پیتا سارے خوف دل دے اتوں صاف ہو گئے
میں آپ اپنا بن کے اج قاصد آپ اپنی عرض گزار آیا
پیر فضل گجراتی
No comments:
Post a Comment
Note: only a member of this blog may post a comment.