پنجابی پوٹھواری پوٹھوہاری پہاڑی شاعری
مَٹھی مَٹھی اَگ جیہی بَلنی رہنڑی اے
اندر و اندر جِند ایہہ گَلنی رہنڑی اے
اَکھیاں چوں ہنجواں نے بَدّل ورہنے نے
یاداں نی اِک نہیری چلنی رہنڑی اے
کوئی نی آیا، کِیہاں کَن کنیڑنے او
بے گناہیا پُتر طالماں ماریا سی
ما نمانڑی تَلیاں مَلنی رہنڑی اے
خوف بنی اے دل نے اندر وَسنی اے
موت حیاتی نال ای پَلنی رہنڑی اے
نال شرِیکاں ہَس ہَس گَلاں کرنی اے
مُونگ اوہ سینے اُپر دَلنی رہنڑی اے
یاداں نی ترِنگل چُکّاں دینڑی اے
عامرؔ نے رُوحے کی سَلنی رہنڑی اے
عامر حبیب عامر
No comments:
Post a Comment
Note: only a member of this blog may post a comment.