چلّو کہانی کریے
جِتھوں تیک کہانی حالاں اَپڑی نئیں اے
اُوتھوں شروع کریے
چلو کہانی کریے
جس وِچ نَوّاں پُرانا کوئی نئیں
جس ِوچ ہَتّھاں، کَنّاں، اکّھاں دے وِچ
فرَق نئیں ہوندا
جس وِچ اگ پانی دا وَیر نئیں رہندا
اُوتھوں ہَتھ لَفظاں دے پھَڑیے
جِتھے بھوئیں دے مَتّھے اُتّے
گزر گئیاں دے پَیر اجّے تائیں
ساہ لیندے نیں
جِتّھے پِچھلے وَین ہِکٹّھے آ بہندے نیں
جِتّھے دِن عرشاں تے سُتّے رہ جاندے نیں
اُتّھے رات پرانی کریے
چلو کہانی کریے
محمود اعوان
