نی مُٹیارے
پہلاں ہَس ہَس لاندے
گُوہڑیاں پاندے
ہَسدیاں رَسدیاں مُٹیاراں نُوں
ہَنجُواں دے وَس پا کے
بدلاں دے پرچھانویں
نی ایہہ بجلی دے لشکارے
نی مُٹیارے
ونج کرن ونجارے
لیہندیوں سُورج کدی نا چَڑھیا دُنیا جانے
بِنا ڈور نا چڑھی کَدی گُڈی اسمانے
ڈُوہنگھے دریا وَیری چَھلّاں
سوچ سمجھ لے ساریاں گَلّاں
کَچّے گھڑّے دغا دے جاندے
پُہنچ کے اَدھ وچکارے
نی مُٹیارے
ونج کرن ونجارے
جے کر تُوں جگراتے کَٹنے
جے کر تُوں ہیرے نے چَٹنے
جے کر تُوں راتاں نُوں سُورج
دن نُوں لَبھنے تارے
تاں تیری مرضی مُٹیارے
نی مُٹیارے
ونج کرن ونجارے
احمد راہی
No comments:
Post a Comment
Note: only a member of this blog may post a comment.