دَسو ایہ قیامت نہیں اے
زندگی ایتھے کی کِسے دی
کردا نہیں کوئی سی کِسے دی
رہی نہ عزت وی کِسے دی
چِٹے دِن وِی دھی کِسے دی
گھر دے وچ سلامت نہیں اے
دسو ایہ قیامت نہیں اے
فصلاں نوں اج واڑ پئی کھاوے
کتیں جیٹھ تے ہاڑ پئی کھاوے
کندھ نوں کندھ دی آڑ پئی کھاوے
ناڑاں نوں ای ناڑ پئی کھاوے
کِسے نوں کوئی ملامت نہیں اے
دسو ایہ قیامت نہیں اے
کیہ دساں میں اج دے رولے
بُھکھ دے رولے رج دے رولے
ڈھگی، وچھی، مجھ دے رولے
مُنصف، قاضی، جج دے رولے
کہڑی کہڑی شامت نہیں اے
دسو ایہ قیامت نہیں اے
حِرص ہوس دی اگ وچ سڑیا
دو یا چار جماعتاں پڑھیا
اِکو نُقطے اُتے اڑیا
فِتنہ وِچ مسیتاں وڑیا
عالم کول امامت نہیں اے
دسو ایہ قیامت نہیں اے
ماڑے دی سرداراں ہتھوں
پِنڈ پِنڈ نمبر داراں ہتھوں
شہر چ شاہوکاراں ہتھوں
کِنے ای کرداراں ہتھوں
ہوندی روز حجامت نہیں اے
دسو ایہ قیامت نہیں اے
پُلساں دے نیں ناکے تھاں تھاں
وجن فِر وی ڈاکے تھاں
نِکے نِکے کاکے تھاں تھاں
کیتی جان دھماکے تھاں تھاں
ہوندی کوئی کرامت نہیں اے
دسو ایہ قیامت نہیں اے
ارشاد سندھو
