اسی کتھے آ بیٹھے آں
دل کردا سی یورپ جائیے
ہیٹ تے کالی عینک پائیے
پیٹر رابرٹ یار بنایئے
پیزے برگر ڈونٹ کھائیے
ایتھے جان پھنسا بیٹھے آں
اسی کتھے آ بیٹھے آں
گڈی ٹھیک کرانڑ سی جانڑاں
پنج چھ بِل چُکانڑ سی جانڑاں
کم تے شکل دکھانڑ سی جانڑاں
پیسے چار کمانڑ سی جانڑاں
سٹھ دی ٹکٹ کٹا بیٹھے آں
اسی کتھے آ بیٹھے آں
پنجرے دے وچ پھڑک گئے آں
ٹیکسی کر کر کھڑک گئے آں
پائلٹ بننڑ دا شوق سی، لیکن
ہر تھاں سڑکو سڑک گئے آں
سارے جوڑ ہلا بیٹھے آں
اسی کتھے آ بیٹھے آں
رعب ذرا وی پا نئیں سکدے
بچیاں نوں دو لا نئیں سکدے
ایتھے کن پھڑا نئیں سکدے
بیگم نوں دھمکا نئیں سکدے
مُچھ نیویں کروا بیٹھے آں
اسی کتھے آ بیٹھے آں
ایم او ٹی کروانؑ دے رولے
کونسل ٹیکس چُکانڑ دے رولے
کار دیاں قسطاں لاہنڑ دے رولے
اُتوں پاکستان دے رولے
سوچاں نال چکرا بیٹھے آں
اسی کتھے آ بیٹھے آں
خط اے اینے سُٹ جاندے نے
پڑھ کے دل ای ٹُٹ جاندے نے
گورے ہس کے لُٹ جاندے نے
کالے ایویں کُٹ جاندے نیں
لگدا پنگا ای پا بیٹھے آں
اسی کتھے آ بیٹھے آں
ہن تے گانڑ نوں دل نئیں کردا
پیزے کھانڑ نوں دل نئیں کردا
باقی سب کجھ دل کردا اے
کم تے جانڑ نوں دل نئیں کردا
دل نوں لکھ سمجھا بیٹھے آں
اسی کتھے آ بیٹھے آں
سجرے پھل تے کلیاں ہوون
اپنے پنڈ دیاں گلیاں ہؤون
لسی ساگ تے چھلیاں ہؤون
اصلی کھوۓ دیاں ڈلیاں ہؤون
برگر توں اکتا بیٹھے آں
اسی کتھے آ بیٹھے آں
ایتھے بوھڑ دی چھاں نیں لبدی
پنڈ جئ سچی تھاں نیں لبدی
مدت بعد وطن جے جائیے
کئیاں نوں فیر ماں نیں لبدی
دو تھاں پیچے پا بیٹھے آں
اسی کتھے آ بیٹھے آں
پچھلے سال بہانہ لا کے
اک پردیسی دیس نوں جا کے
کلیاں بہھ کے اک قبر سرہانے
رویا مٹی سینے لا کے
ہیرے لوگ گوا بیٹھے اں
اسی کتھے آ بیٹھے آں
