کلم کلا ہو سکدا اے

 کلّم کلّا ہو سکدا اے 

ہسّن والا رو سکدا اے 

جے ہووے فنکار اُچیرا 

لہُو نال مٹی گو سکدا اے 

یار نموشی دا اِک ہنجو 

من دا بھانڈا دھو سکدا اے 

اِک دعا دا سُچا اکھّر

سُکّے بدّل چو سکدا اے 

ہڑ اکھیاں وِچ آ جاوے تے 

سارا جگ ڈبو سکدا اے 

بندہ سارے دریاواں نوں 

اکھ وچ بھر کے ڈھو سکدا اے 

سچا عاشق یار دی راہ وچ 

صدیاں تیک کھلو سکدا اے 

کیہڑا میرے وانگوں اشرف 

موتی مُنج پرو سکدا اے 

اشرف نقوی