پنجابی نعتیہ عارفانہ کلام
جس نے مدینے جاناں کر لو تیاریاں
بیڑا مدینے والا لیندا پیا تاریاں
حاجیاں نیں اٹھ سویرے بہ کے روزے دے نیڑے
رو رو کے سوہنےﷺ اگے عرضاں گزاریاں
حاجیاں نیں چُمی جالی جالی او کرماں والی
لکھ پہریداراں پانویں چھڑیاں نے ماریاں
اوتھے نیں ٹھنڈیاں چھاواں دلکش مخمور ہواواں
کھلیاں بہشتاں دیاں جینویں سب باریاں
کعبے دے گرد گھمیئے روزے دی جالی چُمیئے
تک آئیے جنت دیاں نالے کیاریاں
شالا او دن وی آوے سوہناں سانوں کول بلاوے
رل مل کے دیکھن روضہ اے سیّاں ساریاں
آب زم زم میں پیواں اوتھے میں مراں تے جیواں
صدقہ نواسیاں دا سن میریاں زاریاں
سوہنے نوں راضی کرئیے رحمت تھیں جھولی بھرئیے
پلکاں دے نال دئیے تھاں تھاں بھاریاں
رب دا حبیبﷺ اوتھے سب دا طبیب اوتھے
ہوندیاں مدینے جا کے دور بیماریاں
صدمے کیوں ہجر دے سہیئے ایتھے اک پل نہ رہیئے
وسدے چلے جائیے مار اڈاریاں
صورت نورانی جس دی دنیا دیوانی جس دی
کیوں نہ میں جاواں حافظ اس توں بلہاریاں
حافظ محمد حسین
No comments:
Post a Comment
Note: only a member of this blog may post a comment.