نعتیہ عارفانہ کلام
شہنشاہا، حبیبا، مدینے دیا خیر منگنا ہاں میں تیری سرکارﷺ چوں
صدقہ اپنے فقیراں دا دے سوہنیا، خالی جاواں نہ میں تیرے دربار چوں
پہنچ ساحل تے سب دے سفینے گئے، بختاں والے ہزاراں مدینے گئے
میرے بختاں دی کشتی وی نام خدا، پار کر دے غماں دے توں منجھدھار چوں
وقت آخر مدینے جے میں پہنچ جاں، روح جسم میرا چھوڑ جاوے جدوں
تُسی میرا جنازہ میرے ساتھیو! لے کے لنگھناں مدینے دے بازار چوں
جد توں نظراں نے تکیا اے رخ یار دا، مرض ودھدا گیا شوقِ دیدار دا
نبضاں پھڑ پھڑ حکیمو، طبیبو! تسی، لبھدے او کی اس بیمار چوں
ودھ ہے عاشق نوں جنّت توں در یار دا، او درِ یار تو سو جہاں واردا
جیہڑا منگتا اے سوہنےؐ دے دربار دا، اونے لینا کی جنّت دے گلزار چوں
جیہڑا الله دے والیاں تھیں کردا اے سنگ، اوس کچ تے وی آندا اے ہیرے دا رنگ
اوس ہیرے دا کوڈی وی رہندا نہیں مول، جیہڑا ڈگ جاوے ٹٹ کے کسی ہار چوں
ہور کجھ وی نہیں منگدا میں سرکارﷺ توں، جھولی اکھیاں دی خالی اے دیدار توں
ہُن تے حافظ نوں دیدار دی خیر دے، خالی کوئی نہیں گیا تیرےﷺ دربار چوں
حافظ محمد حسین
No comments:
Post a Comment
Note: only a member of this blog may post a comment.