عارفانہ کلام نعتیہ کلام
ایہہ کون آیا جِدھے آیاں بہاراں مسکرا پیاں
کھِڑے نیں پُھل تے کلیاں ہزاراں مسکرا پیاں
بڑی خوش بخت سی ڈاچی سواری کملیؐ والے دی
حلیمہؓ ہتھ جد پھڑیاں،۔ مہاراں مسکرا پیاں
ہمیشہ جیہڑیاں محروم سن قربت دی لذت توں
قدم رکھیا نبیؐ سوہنے تے غاراں مسکرا پیاں
کھڑے سن منتظر سارے نبیؑ اقصیٰ دی مسجد وِچ
امام انبیاﷺ آئے،۔ قطاراں مسکرا پیاں
پِچھاں جبریلؑ سِدرہ تے کھڑا حیران ہوندا سی
اگانہہ لنگھیا نبیﷺ تے رہگزراں مسکرا پیاں
ظہوری بیکساں نے شُکر دے سجدے ادا کیتے
ازل توں غمزدہ سوچاں وچاراں مسکرا پیاں
محمد علی ظہوری
No comments:
Post a Comment
Note: only a member of this blog may post a comment.