بے وس تے لاچار جو ہویا
بندہ بھلن ہار جو ہویا
تیرے حکم نے سر اکھیاں تے
توں میرا سردار جو ہویا
سر وچ چاندی ودھدی پئی اے
سِر درداں دا بھار جو ہویا
منہ وچوں لہو دی بو اوندی اے
زخم جگر وچکار جو ہویا
تاہیں میری غیبت کردا اے
میرا جگری یار جو ہویا
ناز تے نخرے کر سکدا اے
حسن دی او سرکار جو ہویا
تیریاں شاناں اچیاں سائیاں
میں کوجھا بدکار جو ہویا
سارے ویخ کے سٹ دیندے نے
میں کل دا اخبار جو ہویا
نبض تے رکھ مخروطی انگلی
میں تیرا بیمار جو ہویا
مینوں ہسدیاں ویکھ نئیں سکدا
میرا رشتے دار جو ہویا
تیریاں ساریاں سن لینے آں
تیرے نال پیار جو ہویا
ایتھوں پیار دی جِنس نئیں لبھدی
نفرت دا بازار جو ہویا
ہن تے کوئی گل نئیں سنڑدا
گل غربت دا ہار جو ہویا
کچے گھڑے دے ترلے پاواں
اوہ دریاؤں پار جو ہویا
تاہیں دھوکے دینا ایں بابر
تیرے تے اتبار جو ہویا
تفسیر عباس بابر
No comments:
Post a Comment
Note: only a member of this blog may post a comment.