مشکل یاں آسانی یارو
ہووے اِنج کہانی یارو
نور صبح دا لشکاں مارے
سوہنی شام سہانی یارو
پھل پُھل نالے ویلاں بُوٹے
سبزی گھار اگانی یارو
پاک پوِتّر، کُنج کے رکھیو
سوہنی چڑھی جوانی یارو
سُکھاں بھریا جیون ہووے
کوئی نہ اِس دا ثانی یارو
گھراں چہ وسدے بُڈی بندے
گھر دے راجہ رانی یارو
ماپے بھانویں ٹُر جاون تے
رہندی یاد نشانی یارو
دادی کُچھڑ چک کھڈاؤندی
رِیجھاں لاؤندی نانی یارو
ٹبر کَٹھ مُٹھ کیتی رکھدے؟
بوہتے جیٹھ جٹھانی یارو
پیسہ نئیں جے سب کجھ ہندا
لکھ، ہزار، دوانی یارو
ڈُونگیاں جیہڑے گلاں کردے
لبھو سب دے معانی یارو
مشکل بعد آسانی آؤندی
فر کیوں ہجر کہانی یارو
رب جے پردے کجن والا
کیوں ڈھمکان فلانی یارو؟
بندے وی کوئی گھٹ تے نئیں نا
بَھیڑی نئیں زنانی یارو
وردے مینہ وچ موجاں کردے
نکے ہوندیاں ہانی، یارو
ہولا بستہ، ٹاٹ تے بہنا
پھٹی پوچ، سکانی یارو
چالاکاں نے رستے بدلے
کیتی چرب زبانی یارو
مال حرام دا کھادا جِنہاں
کِداں کھیر پچانی یارو؟
بَھیڑے لوکاں کجھ نئی کھٹنا
پانی وچ مدھانی یارو
رب سوہنے دے صدقے جاواں
اوہدی ذات لافانی، یارو
بھلا ای سب دا کرکے جانا
ایہو قاسم ٹھانی، یارو
قاسم سرویا
No comments:
Post a Comment
Note: only a member of this blog may post a comment.