آ جا اِک دن گلاں کریے
آ جا اِک دن گلاں کریے
اوہ گلاں جو رہ گئیاں سن
شِکر دوپہریں پِپلی تھلے
دورکھلوتے مُڑ مُڑ تکدے
اُس دن پانی وارے پاروں
دو بُلھیاں تے اُنگل رکھ کے
تیرے اوس اشارے پاروں
آ جا اِک دن گلاں کریے
اوہ گلاں جو ہو نہ سکیاں
سانجھی چھت تے شاموں پِچھے
لہندے وَلوں گُڑ گُڑ کردے
بدلاں دے آ جاون پاروں
مینہہ دے ڈر توں بھج بھج تیرے
منجیاں اندر ڈھاون پاروں
آ جا اِک دن گلاں کریے
اوہ گلاں جو کردے رہ گئے
پِنڈ دی راہ تے چُھٹی مگروں
چائیں چائیں آپو اپنے
گھر نوں جان دی کاہلی پاروں
تیرے نال سکولوں آؤندی
ٹولی باراں تالی پاروں
آ جا اک دن گلاں کریے
اوہ گلاں جو توں نہ سُنیاں
بیری والے کُھوہ توں اگے
مرچاں چُگ کے آون ویلے
آؤندے جاندے راہیاں پاروں
چوری چوری نرمے وِچوں
تَلّا وڈھدے گھاہیاں پاروں
آ جا اِک دن گلاں کریے
اوہ گلاں جو سمجھ نہ آئیاں
میلے دے وچ ہٹیاں نیڑے
میلہ تکدے کئی لوکاں دے
ون سوَنّے بولاں پاروں
اُچی اُچی تھاں تھاں وجدے
رنگ برنگے ڈھولاں پاروں
آ جا اِک دن گلاں کریے
اوہ گلاں جو دل وچ رہیاں
ساری عمراں اِک تھاں رہ کے
انھے رسم رواجاں پِٹے
ویلے دی مجبوری پاروں
جگ تے بنیاں دو ذاتاں دی
اِک دوجے توں دوری پاروں
ارشاد سندھو
No comments:
Post a Comment
Note: only a member of this blog may post a comment.