درداں بھریا دل اوئے ملا
تڑپھے جیوں بسمل اوئے ملا
وچھڑے آں تے وچھڑے رہیۓ
لوکی لاؤندے ٹل اوئے ملا
شور بھاویں طوفانی ہووے
نال ارادے ٹھل اوئے ملا
جذبے ہون جوان جے اپنے
منزل جاندی مل اوئے ملا
ویلا گھٹ تے منزل دور اے
نہ کر ایڈی ڈھل اوئے ملا
اکھیاں دے وچ ساون بھادوں
ڈُب ڈُب جاوے دل اوئے ملا
اک دُوجے دی سنے نہ کوئی
لوک بڑے سنگدل اوئے ملا
راحت نوں اک پل نہ ملیا
اُجڑ گئی محفل اوئے ملا
اقبال راحت
No comments:
Post a Comment
Note: only a member of this blog may post a comment.