اج کل ایتھے اک دھیلے دی کھٹی نئیں
مینوں لگدا اے، ایہ تے میری ہٹی نئیں
زندہ رہن دی مار بتھیری کھاہدی اے
کیہڑی قید اے جیہڑی ہن تک کٹی نئیں
بڑیاں ڈانگاں اپنے سِر وچ کھادیاں نیں
میں کی دساں کیہڑی بھُگتی چٹی نئیں
میرے زخمی پیر کدے وی تھڑکے نئیں
سر دے اتوں پنڈ کدے وی سٹی نئیں
میں آں کچی تند دی ٹُٹن وای ہاں
میں کوئی پکی سُوتر والی اٹی نئیں
ہتھاں وچوں کھوہ لئی قلم مشقت نیں
میں بدقسمت بال جدے کول پھٹی نئیں
ٹُٹی چھابی دے وچ پاٹا پونا اے
ارشد گھر وچ آٹے والی مٹی نئیں
احمد نعیم ارشد
No comments:
Post a Comment
Note: only a member of this blog may post a comment.