ہسدی ہسدی رُک جاندی اے، دِھی جو ہوئی
دیس پرائے لُک جاندی اے، دھی جو ہوئی
بابل دی پگ، وِیر دی عزت خاطر چندری
ٹُٹے نہ تے جُھک جاندی اے دھی جو ہوئی
نِکی نِکی گل تے روسے پاون والی
اک دابے وچ مُک جاندی اے، دھی جو ہوئی
بوہڑاں ہِیٹھاں پُھٹی ہوئی بُوٹی وانگوں
اُگدے اُگدے سُک جاندی اے، دھی جو ہوئی
باپ دی قبر تے جا کے رو لیندی اے
مال و زرتے تُھک جاندی اے، دھی جو ہوئی
ظفر اعوان
No comments:
Post a Comment
Note: only a member of this blog may post a comment.