ورھیاں پہلوں پیار وفا دے
نکھڑ گئے سن ڈار وفا دے
نہ چکے نہ سمجھے لوکاں
کیہ ہوندے نیں بھار وفا دے
جِنے وی سن کربل وچ سن
ودھ توں ودھ شاہکار وفا دے
رہندا کیہ اے چانن کر گئے
جُسے تارو تار وفا دے
رُتبے وی سِر لتھیاں لبھدے
رُتبے وی فِر یار وفا دے
نِتّر گئے سن بند پانی چوں
کِدھر سی انکار وفا دے
سندھو یار بہتر ای نیں
اج وی دعویدار وفا دے
ارشاد سندھو
No comments:
Post a Comment
Note: only a member of this blog may post a comment.