ٹھہر ذرا سوچ والی چرخی گُھمان دے
کون ایں تے کیہ ایں تُوں ذہن تے لڑان دے
ہور کِتے ویکھیں گا تے شعر بُھل جائیں گا
میرے ول ویکھ میرے شعراں تے دھیان دے
روح تک پہنچیا ہنیر ایس رات دا
تھوڑی جنی روشنی تے میرے ول آن دے
جنگ دی نہ گل کر جنگ حالی رہن دے
پیار والا گیت مینوں پیار نال گان دے
ماڑے آں تے کیہ ہویا، ساڈا وی تے جی اے
کدی کدی دل والی سانوں وی سُنان دے
پنڈ نال پیار اے تے پنڈ وچ بیٹھے آں
شہراں تک پہنچ گئے نیں کئی میرے ہان دے
صغیر تبسم
No comments:
Post a Comment
Note: only a member of this blog may post a comment.