اُچیاں ہون لئی جُھکنا چاہناں
نت جیون لئی مُکنا چاہناں
گلیاں رہن چ ڈنگ دا ڈر اے
سدھیاں رہن لئی سکنا چاہناں
وگ وچ رہن نہیں وارا کھاندا
لبھیا جان لئی لکنا چاہناں
امبراں عادی کر دتا اے
دھرتی سر تے چکنا چاہناں
جاون لئی اگے توں اگے
آپ نشانیوں اُکنا چاہناں
اوتھے پلک کھلون نہیں ہوندا
جتھے نت لئی رُکنا چاہناں
گم سم ویکھ دوالا احقر
آپ اپنا مُل ٹکنا چاہناں
یونس احقر
No comments:
Post a Comment
Note: only a member of this blog may post a comment.