کوئی سورج نواں، مدار نواں
اس نویں لئی، کوئی دیار نواں
ٹھنڈ دل وِچ پوے نویں کوئی
ویریاں نوں چڑھے بخار نواں
عشق دے اس پرانے جال لئی
حُسن کوئی نواں، شکار نواں
کد تک ایہو بہار، ایہو خزاں
مالک! اس وار کجھ اتار نواں
کون ہویا اے کول ہو کے پرے
درد اُٹھیا اے پہلی وار نواں
جام وِچ عکس ہے اہدے مُکھ دا
ایویں اکھیاں چ نئیں خمار نواں
ہِجر وِچ نئیں رہیا مزا ہُن اوہ
تِیر دل چوں کوئی گُزار نواں
اُٹھ رہے نے قدم ستاریاں ول
سیر لئی، ہے نا! ایہ بزار نواں
واہ شہزاد! جوڑ توڑ تِرے
اوہو اَکھر نیں، پر نکھار نواں
شہزاد اسلم
No comments:
Post a Comment
Note: only a member of this blog may post a comment.