سو گلاں دی اکو گل اے

 سو گلّاں دی اِکو گل اے

تینوں پِچھے لان دا ول اے

تیرے نیلے نیناں اندر

عشق چناں دی تگڑی چھل اے

"کل آواں گی، کل آواں گی"

ظالمے تیری کیہڑی کل اے

سوہنی دے لئی ڈُبناں کیہ اے

سسی دے لئی کاہنُوں تھل اے

سجن باجھوں جینا کاہدا

مرن علاوہ کیہڑا حل اے

عشق جیہدا وی ہووے ایتھے

پیر پیر تے مارُو تھل اے

جیہڑے پل وچ توں مِلیا سی 

میرا جیون اوہو پل اے

جدی پُشتی رانجھا واں میں

عشق سلامت میری ال اے

میرے اُتے قبضہ تیرا

تیرے اُتے میری مل اے

ہجرا جنی مرضی لاہ لے

لہہ نہیں سکدی میری کھل اے

ڈنگراں دے گل ٹلیاں ایتھے

بندیاں دے وی گلمے ٹل اے

موسما! تیرا آنا جانا

دسدا رہندا چل سو چل اے

اج نئیں میتھوں ہسیا جانا

اج طبیعت ٹوٹل ڈَل اے 

یار صفی دا یار رسیلا

سُرخ اناراں ورگا پھل اے

سرفراز انور صفی