ساہ ساہ دی قربانی دِتی
ساہ ساہ نوں دفنایا
ساہ وچ ساہ نہ آیا
اندرلا ساہ اندر تے
باہرلا باہر ای ڈکیا
خواباں وچ وی تانگھ کِسے دی
اڈیاں چا چا تکیا
سدھراں وی جے رِنھ پکائیاں
عیداں فیر نہ آئیاں
تن پِنجر وی سُکنے پائے
اِلاں کانواں ماس دھرویا
بچدا اپنا آپ جھلُویا
اکھاں سوڑ سواہ وچ سڑیاں
اُپروں رتی انھیری جھُلی
پِچھے رڑے دا رڑہ
کاغذ کانا قلم نہ کوئی
پھر گئی مرگ سیاہی
کیڑیاں دیاں لمیاں قطاراں
کجھ اپنے کِسے موئے نوں وی
چُکی چائی جاندے
آؤندے جاندے اک دُوجے نال
مونہہ جوڑ کجھ دس پُچھ لنگھدے
بھاہ دی بھخدی بھانبڑی
سُکے دریاواں تے اُڈدے اِلاں تے کاں
ہور نہ کوئی ناں نشان
مِٹی دے کسے ڈھیر دے اُپر
پانی دے کجھ قطرے
کھوٹے کھرے وین تے ہاڑے
دِکھلاوے دیاں ڈھاواں
ستھر پھُوہڑی مونہہ ملا حظے
ورتن بھاجی کوڑے وٹے
آپو اپنی ویترچال
بس اپنی ُسرت سنبھال
خالد حسین تھتھال
No comments:
Post a Comment
Note: only a member of this blog may post a comment.