متاں
میرا آکھا من لے پُترا
ہر گل پلے بنھ لے پترا
موڑاں والی راہ نئی چنگی
نِت بیگانی چاہ نئی چنگی
اصلوں ہولا دل نئی چنگا
بوہتا وڈا تِل نئی چنگا
بوہتی کِھلری ول نئی چنگی
کنڈیوں اوہلے گل نئی چنگی
تڑ کے ماری چھال نئی چنگی
بوہتی لمی کال نئی چنگی
رُکھاں تھلے مچ نئی چنگا
ڈھیر فسادی سچ نئی چنگا
ککھاں نیڑے اگ نئی چنگی
سر توں پاری پگ نئی چنگی
بے قدرے دی کھوہ نئی چنگی
بدو بدی دی موہ نئی چنگی
اس توں پچھے ہور نوں پھڑیے
پہلاں گھر دے چور نوں پھڑیے
کرنی انت اخیر نئی چنگی
کُتیاں اگے کھیر نئی چنگی
لڑ کے کیتی ونڈ نئی چنگی
لُون دے نیڑے کھنڈ نئی چنگی
منگویں سوچ تے چُک نئی چنگی
سٹ کے چٹنی تُھک نئی چنگی
کچی پلی رُت نئی چنگی
سب نوں دسدی گُت نئی چنگی
اکھاں دے وچ قہر نئی چنگا
جیبھ وِچ پریا زہر نئی چنگا
تُوں تُوں تے تکرار نئی چنگی
ہٹ تے بیٹھی نار نئی چنگی
وکھری وکھری تون نئی چنگی
ایویں کرنی چوٹ نئی چنگی
جیٹھ ہاڑ دی دُھپ نئی چنگی
موتاں ورگی چُپ نئی چنگی
رستے دے وچ بیر نئی چنگی
صلح چ کرنی دیر نئی چنگی
اے گلاں جے بُھل جاویں گا
پُترا جگ تے رُل جاویں گا
ارشاد سندھو
No comments:
Post a Comment
Note: only a member of this blog may post a comment.